သလဲပင်ရဲ့ ဆေးဝါးဆိုင်ရာ ဂုဏ်သတ္တိများ

သလဲပင်နှင့်ပက်သက်၍ ဆေးသုံးများစွာရှိသလို တရုတ်နိုင်ငံရဲ့ ကျမ်းဝင်ဆေးအဖြစ်လည်း တည်ရှိပါတယ်။ အာရှတိုက်အနောက်ဘက်တွင် စတင်တွေ့ရှိခဲ့ပြီး အာရှတိုက်အလယ်ပိုင်းနှင့် ဥရောပတိုက်တို့တွင် သဘာ၀အလျောက် ပေါက်ရောက်ပါတယ်။

သလဲပင်အပွင့်အား ဆီးချိုရောဂါကုသဆေးအဖြစ် ယူနာနီ (unani) ဆေးပညာတွင် အသုံးပြုကြပါတယ်။ သုတေသနစမ်းသပ်ချက်တွင် မိသနောဖြင့် ထုတ်ယူသော သလဲပွင့် ဆေးအနှစ်ဟာ ဆီးချိုရောဂါရှိသော ကြွက်များတွင် သွေးအတွင်းသကြားဓာတ်တက်မှုကို တားဆီးပေးသည်ဟု ဆိုပါတယ်။

သလဲသီးအခွံ(အကာ)မှ ထုတ်သောဆေးအနှစ်ဟာ တိုင်ဖွိုက်ရောဂါကိုဖြစ်စေသော ဘတ်တီးရီးယား၊ ကာလ၀မ်းရောဂါကိုဖြစ်စေသော vibrio cholera Giardia၊ ဝမ်းကိုက်ရောဂါဖြစ်စေသော amoeba ပိုးတို့အပေါ် အာနိသင်ရှိကြောင်း စမ်းသပ်မှုများက ဖော်ပြကြပါတယ်။

polyphenol ပြည့်ဝစွာပါရှိသော သလဲသီးအခွံဆေးအနှစ်သည် Leukemia cells များကို သာမန်ကျန်းမာသောဆဲလ်(normal cell) များသို့ ပြန်လည်ပြောင်းလဲသွားစေသည်ဟုဆိုပါတယ်။သလဲသီးဆေးအနှစ်ကို အသားမြတ်ကင်ဆာ၊ ဆီးကြိတ်ကင်ဆာ၊ အူမကြီး colon ကင်ဆာများ ကုသမှုတွင် အာနိသင်ရှိမရှိစမ်းသပ်သင့်ကြောင်း သုတေသီများကအကြံပြုထားပါတယ်။

၂ ရာစု ဂရိသမားတော်ကြီး (Soranus) ဟာ ရှေးအကျဆုံး မီးယပ်ရောဂါအကြောင်းရေးသားခဲ့သူဖြစ်ပြီး သူ၏ရေးသားမှုတွင် သလဲသီးအား ပဋိသန္ဓေတားသည့်ဆေးနှင့် ပဋိသန္ဓေတားဆီးရန် မိန်းမကိုယ်-မွေးလမ်းကြောင်းသို့ ထည့်သွင်းသည့်ဆေးအဖြစ် သုံးစွဲခဲ့ကြောင်း ဖော်ပြခဲ့ပါတယ်။ သလဲသီးကို ယခုတိုင် အာဖရိကနိုင်ငံအချို့တွင် ကိုယ်၀န်တားဆေးအဖြစ် အသုံးပြုလျက်ရှိပါတယ်။

တရုတ်နိုင်ငံခေတ်သစ်ပရဆေးပညာတွင် သလဲသီးအား ၀မ်းလျှော၀မ်းကိုက် သွေးယိုစီးခြင်းနှင့် အစာလမ်းကြောငိးရှိ သံကောင်ရောဂါများ ကုသရာ၌ အသုံးပြုကြပါတယ်။

အမေရိကန်နှင့် ဥရောပနိုင်ငံတို့တွင်သလဲသီး၏ ဓာတ်တိုးဆန့်ကျင်အာနိသင် (antioxidant activity) နှင့်ကင်ဆာကာကွယ်ရေးအတွက် အလားအလာရှိသောကြောင့်သလဲသီးကို ပိုမိုတန်ဖိုးထားလာကြပါတယ်။