HEALTH
ဆေးဖက်၀င် ဖန်ခါးသီး (myrobalan) အကြောင်းသိကောင်းစရာ
မြန်မာအမည် – ဖန်ခါး
အင်္ဂလိပ်အမည်- Myrobalan
မူလပေါက်ရောက်ရာဒေသမှာ အာရှတိုက် အလယ်ပိုင်းနှင့် အိန္ဒိယနိုင်ငံတို့ ဖြစ်ပါတယ်။ အီရန်၊ ပါကစ္စတန် နီပေါ သီရိလင်္ကာ လာအို တရုတ်နှင့် ဗီယက်နမ်တို့တွင်လည်း တွေ့ရပါတယ်။
မြန်မာနိုင်ငံတွင်လည်းအနှံ့အပြားပေါက်ရောက်ပြီး ဖန်ခါးသီးအစိမ်းကို တို့စရာအဖြစ်လည်းကောင်း အသီးဆားရည်စိမ်အသုပ်အဖြစ် စားသုံးခြင်း စသော ရိုးရာဓလေ့များ ရှိပါတယ်။
ဖန်ခါးသီးကို အိန္ဒိယ နိုင်ငံ ဆေးကျမ်းတွင် နှစ်ထောင်ပေါင်းများစွာကပင် အစာခြေခြင်း ဆိုင်ရာ ကိစ္စများအတွက် ဦးစားပေးအသုံးပြုခဲ့ကြပါတယ်။ ဖန်ခါးသီးကို ပုံမှန်စားသုံးခြင်းအားဖြင့် အစာချေမှုကို မြှင့်တင်ပေးခြင်း၊ အူနှင့်ဆိုင်သောရောဂါများ မဖြစ်အောင်ကာကွယ်ပေးခြင်းနှင့် ကျွန်တော်တို့ စားသုံးသောအစာ၏အာဟာရစုပ်ယူမှုကို တိုးမြှင့်ပေးနိုင်ပါတယ်။
ဖန်ခါးသီးထဲတွင် antioxidants ဓာတ်များကြွယ်ဝစွာပါဝင်ပါတယ်။ ellagic acid, gallic acid, chebulic acid, flavonol glycosides, selenium နှင့် ဗီတာမင်စီ တို့ပါဝင်ခြင်းကြောင့်ခန္ဓာကိုယ်အတွင်း ရောဂါဖြစ်ပွားမှုနှင့် ကင်ဆာရောဂါဖြစ်ပွားမှုကို ကာကွယ်ပေးနိုင်ပါသည်။ ဗိုင်းရပ်ရောဂါများကိုလည်း ကာကွယ်ပေးနိုင်ပါတယ်။
ဖန်ခါးသီးကိုစားသုံးခြင်းအားဖြင့် အမြင်အာရုံကိုကောင်းမွန်စေပါတယ်။ ဖန်ခါးသီးကိုထု၍ ၁ ညရေစိမ်ပြီး ထိုရေကြည်ဖြင့်မျက်စိကိုဆေးပေးပါက မျက်စိနာကျင်ကိုက်ခဲခြင်းကို ပျောက်ကင်းစေနိုင်ပါတယ်။ဖန်ခါးရေဟာ အကိုက်အခဲပျောက်စေခြင်း၊ ရောင်ရမ်းနာကျင်ခြင်းနှင့် မျက်စိအမြှေးရောင်ခြင်း တို့ကိုသက်သာပျောက်ကင်းစေနိုင်ပါတယ်။
ဆေးဘက်ဆိုင်ရာအသုံးပြုပုံ
ဖန်ခါးပြုတ်ရည်ကို ပါးစပ်ရောင် ပါးစပ်နာရောဂါ သွားဖုံးရောဂါတို့တွင် ပလုပ်ကျင်းဆေးအဖြစ် အသုံးပြုကြပါတယ်။
နာတာရှည် ၀မ်းလျှော၀မ်းပျက်ရောဂါ လေထိုးလေအောင့်ဖြစ်ခြင်း အော့အန်ခြင်း ဗိုက်ရစ်၍အောင့်ခြင်း တို့တွင်အသုံးပြုကြပါတယ်။
အန္တရာယ်ကင်းမှုနှငိ့ ဘေးထွက်ဆိုးကျိုး
ကိုယ်၀န်ဆောင်မိခင်များတွင် အသုံးမပြုသင့်ပါဘူး
စိုက်ပျိုးထုတ်လုပ်မှု
အစေ့ကို ပျိုးထောင်၍ စိုက်ပျိုးနိုင်ပါတယ်။ ပျိုးသက် ၃လ ၄လအကြာတွင် ပျိုးအိတ်သို့ ထည့်ရပီး ၁နှစ်သားခန့်တွင် မြေချ၍ စိုက်နိုင်ပါတယ်။ အပင်သက် ၆နှစ် ၇နှစ်ခန့်တွင် အသီးစတင်သီးပါတယ်။ အပင်သက်တမ်းရင့်လာပါက အသီးထွက်နှုန်း ပိုကောင်းလာပါတယ်။ အပူချိန်နှငိ့ မိုးရေချိန် အနည်းအများကို ခံနိုင်ရည်ရှိပါတယ်။
မြန်မာနိုင်ငံအလယ်ပိုင်းဒေသများတွင် ဤအပင်ဟာ သဘာ၀အလျောက် ပိုမိုဖြစ်ထွန်းပါတယ်။