၀န်ကြီးချုပ် မိုဒိီမှ လယ်ယာဥပဒေသစ်အား ဆန္ဒပြတဲ့ အိန္ဒိယလယ်သမားများကို ဆွေးနွေးပွဲအသစ်ကျင်းပဖို့ ကမ်းလှမ်း

အိန္ဒိယ၀န်ကြီးချုပ်မှ လယ်ယာစိုက်ပျိုးရေး ပြုပြင်ပြောင်းလဲမှု ဥပဒေသစ်နဲ့ ပတ်သက်ပြီး ရှေ့မတိုးသာ နောက်မဆုတ်သာ ဖြစ်နေတဲ့ အခြေအနေ အဆုံးသတ်ရန်အတွက် ဆွေးနွေးပွဲသစ်တွေ ကျင်းပဖို့ သောကြာနေ့မှာ ကမ်းလှမ်းခဲ့ပါတယ်။

ဒါဟာ ဝန်ကြီးချုပ် မိုဒီအနေနဲ့ ဤ ဥပဒေကို တစ်လနီးပါးကြာ ကန့်ကွက်ဆန္ဒပြနေတဲ့ လယ်သမားတွေအပေါ် ပြေလည်မှု ရယူနိုင်ရရေးအတွက် နောက်ဆုံး ကြိုးပမ်းလာတာလည်း ဖြစ်ပါတယ်။

ဥပဒေအရ အစိုးရဟာ ဂျုံနဲ့ ဆန်ကို အာမခံသတ်မှတ်ဈေးနှုန်းနဲ့ ဝယ်ယူတာကို ရပ်ပစ်လိုက်မှာဖြစ်ပြီး ဒီအတွက် ဈေးကွက်မှာ စိုက်ပျိုးထွက်ကုန်ဒိုင်ကြီးတွေ လက်ဝါးကြီးအုပ်မှာကို လယ်သမားတွေက စိုးရိမ်နေကြတာလည်း ဖြစ်ပါတယ်။

“ပြည်တွင်းဈေးကွက်တွေ ပိတ်ပစ်ရမယ်၊ ထွက်ကုန်တွေကို အနိမ့်ဆုံးဈေး သတ်မှတ်ပေးတာလည်း ရှိတော့မှာ မဟုတ်ဘူး ဆိုတဲ့ အလိမ်အညာစကားတွေ ပြန့်နေပါတယ်။ ဒီလို နိုင်ငံရေးမကင်းတဲ့ စေ့ဆော်တာတွေကြောင့် လမ်းလွဲမသွားစေချင်ဘူး”လို့ အသက် ၇၀ ရှိ၀န်ကြီးချုပ် မိုဒီက ပြောကြားခဲ့ပါတယ်။

“ဒိီလို နိုင်ငံရေးပါတီတွေက ကျွန်တော်တို့ကို ဆန့်ကျင်ဖီဆန်ပြီး အလိမ်အညာစကားတွေပျံ့နေတဲ့ကြားကပဲ ကျွန်တော်တို့ လယ်သမားတွေအတွက် ပြဿနာတိုင်းကို ဆွေးနွေးဖို့ အဆင်သင့်ရှိနေတယ်ဆိုတာကို ပြောထားချင်ပါတယ်”လို့ သူက ဆိုပါတယ်။

ဝန်ကြီးချုပ် မိုဒီဟာ ပြီးခဲ့တဲ့နှစ်က သူ့ ပါတီ ဖော်ဆောင်တဲ့ ဘဏ္ဍာရေးအစီအစဉ်အရ သန်း ၉၀ သော လယ်သမားများအတွက် အမေရိကန်ဒေါ်လာ ၂ ဒသမ ၅ ဘီလီယံကိုလည်း ထုတ်ပေးထားပြီးဖြစ်ပါတယ်။

အဲဒီ တိုက်ရိုက် ငွေသားချပေးတဲ့ အစီအစဉ်အရ သီးစားလယ်သမားတစ်ဦးဟာ တစ်နှစ်ကို အရစ်ကျ လေးကြိမ် ပြန်ဆပ်ရပြီး ရူပီး ၆၀၀၀ (အမေရိကန်ဒေါ်လာ ၈၂ ဒေါ်လာ)ကို ရရှိတာဖြစ်ပါတယ်။