AGRICULTURE
လီလီ(lily)ပန်းစိုက်ပျိုးနည်း
ဂျပန်နိုင်ငံမှာ ဇူလိုင်မွေးဖွားသူတွေရဲ့ မွေးလကိုကိုယ်စားပြုတဲ့ပန်းဟာ လီလီပန်းဖြစ်ပါတယ်။ လီလီပန်းကိုအထက်တန်းဆန်တဲ့ပန်းလို့သတ်မှတ်ကြပြီး ကောင်မလေးတွေကို အဖြူရောင် lilyပန်း ပေးလေ့ရှိကြပါတယ်။ အိန္ဒြေသိက္ခာကြီးတယ်၊ ဂုဏ်မြင့်တယ်လို့လည်း အဓိပ္ပါယ်ရပါတယ်။
lily ပန်းကို နေရာဒေသမရွေးစိုက်ပျိုးနိုင်ပါတယ်။အလင်းရောင်ကို နှစ်သက်ပြီးနေရာကောင်းရဖို့လိုပါတယ်။လောင်းရိပ်ကျလွန်းပါက ကောင်းစွာကြီးထွားမှု မရှိနိုင်ပါဘူး။အထူးသဖြင့်နံနက်နေရောင် ကောင်းစွာရဖို့လိုပါတယ်။
မြေဘောင်လုပ်၍စိုက်ပျိုးနိုင်ပါတယ်။မြေဘောင်ကို နွားချေးများများနှင့်နှပ်ထားပေးဖို့လိုပါတယ်။ပေါင်းမြက်များ ရှင်းလင်းရလွယ်ကူရန်အကျယ်၃ပေရှိသောဘောင်ပြုလုပ်ရပါမယ်။
မြေစေးအတွက် သဲနှုန်းမြေ၊မြေဆွေး၊ နွားချေး(သို့) ကြက်ချေးတို့အသုံးပြုနိုင်ပါတယ် ။မြေသြဇာ 50:30:20 အချိုးရောစပ်ပြီး စိုက်ပျိုးရပါမယ်။မြေဘောင်ကို ကြိုတင်ပြင်ဆင်ပြီး တစ်လကျော်မှသာစိုက်ပျိုးတာအကောင်းဆုံးပါပဲ။
သတိပြုရမည့်အချက်
လီလီပန်းမျိုးဥဟာ ဓါတ်မြေသြဇာ၊နွားချေး၊မြေဆွေးတို့နှင့် တိုက်ရိုက်ထိတွေ့မှုမရှိစေရန် ဂရုစိုက်ရပါမယ်။မျိုးဥ ပျက်စီးနိုင်တတ်သောကြောင့်ဖြစ်ပါတယ်။ ဥမှ ထွက်လာသောအမြစ်များနှင့်သာမြေသြဇာများထိတွေ့ရန် လိုအပ်ပါတယ်။
စိုက်ဘောင်အား ၃ ပေအကျယ်နှင့် ဘောင်အရှည်အတွက် မိမိအဆင်ပြေသလို ပြုလုပ်နိုင်ပါတယ်။ တစ်ပင်နှင့်တစ်ပင် ၉ လက်မ ပတ်လည် စိုက်ပျိုးပေးနိုင်ပါတယ်။ အပင်ထွက်လာပြီး ရက်၂၀ – တစ်လသားအရွယ်တွင် ပေါင်းလိုက်၍အစာကျွေးရပါမယ်။
မှိုသတ်ဆေး တစ်မျိုးမျိုးကို စိုက်ဘောင်ပေါ်ဖြူး၍ အပေါ်ယံမြေဖြင့် ရောမွှေပါကမျိုးဥပုပ်ခြင်းနှင့် မြေဆောင်မှိုရောဂါ ကြိုတင်ကာကွယ်နိုင်ပါတယ်။
လီလီပန်းပင်သည် နေရောင်ကို ကြိုက်နှစ်သက်ပေမယ့် မျိုးဥများကတော့ အေးတဲ့ရာသီဥတုကို ကြိုက်နှစ်သက်ပါတယ်။ စိုက်ကျင်းအနက်ကို ၆ လက်မထိ တူးရန်လိုအပ်ပါတယ်။ စိုက်ကျင်းနက်နက်တူးခြင်းဖြင့် မျိုးဥများကို အပူမှ ကာကွယ် ရုံသာမက ပန်းပင်၏ ပင်စည်များကိုလည်း ပိုသန်မာစေပါတယ်။
ပျိုးဥနုလျှင်အပင်မအောင်နိုင်သောကြောင့်ပျိုးဥအရင့်များကိုရွေးချယ်စိုက်ပျိုးဖို့ အဓိကလိုအပ်ပါတယ်။စိုက်ပြီး ၁၅ ရက်အကြာတွင် နုထွားသော အပင်ပေါက်လာများစထွက်လာပြီး ၃ လအကြာတွင်အပွင့်များဖူးလာနိုင်ပါပြီ။
ပန်းပင်များသည် အမြင့်ပေ ၃ ပေမှ ၅ ပေ ရှိသောကြောင့် အပင်ရိုင်းလဲမှု မဖြစ်စေရန် ဝါးတန်းများ ထိုးပေးခြင်း၊ ဝါးငုတ်တိုင်များပေးခြင်း၊ ကြိုးခြည်ပေးခြင်းများ ပြုလုပ်ပေးသင့်ပါတယ်။
အကယ်၍ ပန်းပွင့်ချိန်၌ မိုးရွာခြင်း ၊ဆီးနှင်းကျခြင်းများ ဖြစ်ပေါ်ပါက ရိုးရိုးရေဖြင့် ပြန်ဖျန်းပေးဖို့လိုပါမယ်။
မျိုးဥယူလိုသူများအနေဖြင့် အပွင့်ရောင်းပြီးအပင်များကို ဒီတိုင်းထားရပါမယ်။ပန်းပင်ဖြတ်ပြီး တစ်လမှ ၂ လ အကြာတွင် မျိူးဥတူးဖော်နိုင်ပြီး ပန်းပင်များအား မဖြတ်ဘဲ မျိုးစေ့ခံထားနိုင်သည်။အပင်၁ပင်လျှင် မျိုးဥ ၅ဥခန့်ပြန်လည်ရရှိနိုင်ပါတယ်။
တူးယူထားသည့် မျိုးဥများကိုအရိပ်ထဲတွင်၃ ရက်ခန့်အခြောက်ခံပြီး ကပ်နေသည့်မြေကြီးများကိုဖယ်ရှားရပါမယ်။
မျိုးဥများကို အခြောက်ခံထား၍မရပါဘူး။၀ယ်သူလိုအပ်သည့်ရက်နှင့်ချိန်၍ မျိုးဥတူးယူရပါတယ်။ ၀ယ်ယူသူမှလည်း အပင်ပေါက်အားကောင်းရန်ချက်ချင်းစိုက်ပျိုးဖို့လိုအပ်ပါလိမ့်မယ်။
ပန်းအိုးငယ်လေးများ၊ပျိုးအိတ်အကြီးများဖြင့်လည်းစိုက်ပျိုးနိုင်ပါတယ်။
ပန်းအိုးဖြင့်စိုက်ပျိုးလိုသူများအတွက် လိုအပ်သောပါ၀င်ပစ္စည်းများ
၁)ပန်းအိုးအသေး
(၂)လီလီပန်းဥ၂ဥ
(၃)မြေကြီး၊ မြေဆွေး
ပထမအဆင့်အနေနဲ့ ပန်းအိုးထဲသို့ မြေကြီးများဖြည့်ရပါမယ်။
ဒုတိယအဆင့်အနေနဲ့ ပန်းဥဖတ်များကိုခြွေပြီး မြေကြီးထဲမြှပ်ထည့်ပေးရပါမယ်။ ရေပုံမှန်လောင်း၍ နေရောင်ခြည်ကောင်းစွာရရှိပါက အိုးဖြင့်လည်းကောင်းမွန်စွာစိုက်ပျိုးနိုင်ပါတယ်။ရေမ၀ပ်စေဖို့ သတိပြုဖို့လည်းလိုပါမယ်။