အထပ်မြင့်၀ရံတာတွင်စိုက်ပျိုးရာ၌ လုပ်ဆောင်သင့်သောအချက်များ

အထပ်မြင့်တိုက်ခန်းများတွင်နေထိုင်သော အိမ်ရှင်မများလည်း ဟင်းသီးဟင်းရွက်အတိုအထွာများကို အထပ်မြင့်၀ရံတာများတွင် စိုက်ပျိုးနိုင်ပါတယ်။

လတ်ဆတ်သန့်ရှင်းစွာ စားသုံးရသည့်အပြင် စျေးသို့အပြေးသွားရသည့် ဒုက္ခလည်းကင်းနိုင်ပါတယ်။ထို့အပြင် စိမ်းလန်းသေယအပင်လေးများကို မြင်တွေ့ရသဖြင့် စိတ်၏ချမ်းသာမှုကိုလည်း ရရှိစေပါတယ်။

အထပ်မြင့် ၀ရံတာများတွင် စိုက်ပျိုးရာ၌ လုပ်ဆောင်သင့်သောအချက်များကို ဖော်ပြပေးသွားပါမယ်။

-မိမိတို့၏၀ရံတာရှေ့၊ မီးဖိုချောင် ပြတင်းပေါက်စသည့်နေရာများတွင် နေရောင်ရရှိမှုအခြေအနေအရ အကန့်အသတ်ရှိပါက ၀ယ်စရာအများအပြားမလိုအပ်ပဲ အလွယ်တကူခူးယူစားသုံးနိုင်သည့် တရုတ်နံနံ၊ ငရုတ်သီးစိမ်းကဲ့သို့သော အပင်များကို ဦးစားပေးရွေးချယ်နိုင်ပါတယ်။

– နောက်တချက်မှာ အချိန်တိုတိုနှင့် ခူးဆွတ်နိုင်သော ဥပမာ မုန်လာဥဖြူ၊ သကြားမုန်လာ၊ အရွက်စားပင်များဖြစ်သော ဟင်းနုနွယ်၊ ဆလတ်ရွက် ကြီးထွားမှုမြန်သည့် သီးစားပင်များဖြစ်သော ငရုတ်၊ ငရုတ်ချို၊ ခရမ်း၊ ခရမ်းချဥ် များကိုစိုက်ပျိုးနိုင်ပါတယ်။

-လုပ်ဆောင်ချက်များအားလုံးသည် သန့်သန့်ပျံ့ပျံ့ဖြစ်ရန် လိုအပ်ပါတယ်။

-အသုံးပြုမည့် အိုး၊ သေတ္တာများကို တတ်နိုင်လျှင် ပေါ့ပေါ့ပါးပါးဖြစ်ပြီး လှပသောရောင်စုံပလတ်စတစ်အိုးသေတ္တာများကိုအသုံးပြုသင့်ပါတယ်။ မျက်စိသာဒရှိပြီး ပေါ့ပါးတဲ့အတွက် လွယ်ကူစွာလည်းရွေ့ပြောင်းနိုင်ပါတယ်။

-အသုံးပြုသည့် ပျိုးခံပစ္စည်းများမှာ ညစ်ပတ်ရန်မသင့်လျော်သဖြင့် မြေသြဇာအနေနဲ့ မြေကြီးကိုအသုံးမပြုဘဲ တချို့ကို သဲကြမ်း ၂ဆ၊ စက်ဖွဲပြာ ၁ဆ၊ နွားချေးဆွေး ၁ဆဖြင့်ရောစပ်ပြီး  မီးဖိုပေါ်တွင် ဒယ်အိုးတစ်ခုဖြင့် ထည့်လှော်ကာ ပိုးသန့်စင်၍ အသုံးပြုနိူင်ပါတယ်။

-အချို့အပင်များကိုလည်း မြေကြီးလုံး၀မပါဘဲ၊ ဗေဒါမြေဆွေးကဲ့သို့သော spongy like compost ကိုအသုံးပြုပြီး စိုက်ပျိုးခြင်းက အိုးကိုပေါ့ပါးစေပါတယ်။ ခရမ်းချဥ်၊ ဆလတ်စသည်တို့ကို ဗေဒါမြေဆွေးနှင့်စိုက်ပျိုးနိုင်ပါတယ်။ယခုဖော်ပြသော ​စပ်မြေအချိုးမှာ လေ၀င်လေထွက်ကောင်းပြီး ပေါ့ပါးသည့်အပြင် ရေအကြိမ်ကြိမ်လောင်းသော်လည်း ရေ၀ပ်ခြင်းမဖြစ်စေပါဘူး။

-အပင်ရှည်မျိုးများအတွက် ထောက်တိုင်ကိုအသုံးပြု၍ တိုင်ထောက်ပြီးစိုက်ပျိုးနိုင်ပါတယ်။ထောက်တိုင်ဖြင့်စိုက်ကာ အပင်ရှည်တတ်လာသည့်အခါတွင် တိုင်မှာမြဲနေအောင်ချည်ပေးဖို့တော့လိုပါမယ်။

-အမျိုးအစားမတူသော ဆေးဖက်၀င် ပင်စိမ်း၊ ဇီယာ၊ ကုဆိုင် ကဲ့သို့သော် ဟင်းခတ်အမွှေးအကြိုက်များကို ပန်းအိုးတစ်အိုးထဲတွင်လည်း စုပေါင်းစိုက်ပျိုးနိုင်ပါတယ်။ ပန်းအိုးများကို ဆင့်ပြီးတော့ စိုက်ပျိုးခြင်းဖြင့်လည်း ၀ရံတာကို အလှဆင်နိုင်ပါတယ်။

-ခရမ်းချဥ်နှငိ့ချစ်တီးပုပန်းပင်များက်ု တစ်အိုးထဲမှာ ချိတ်ဆွဲစိုက်ပျိုးတာမျိုးကိုလည်း ပြုလုပ်နိုင်ပါတယ်။ ချစ်တီးပန်းရဲ့အနံ့က ပိုးမွှားတွေ ကြောက်တဲ့အတွက် ခရမ်းချဥ် အရွက်တွေကို အဆိပ်အတောက်ဖြစ်စေသော ပိုးမွှားဒဏ်ကို ကာကွယ်ပေးနိုင်ပါတယ်။

-သောက်ရေသန့် ဘူးခွံများကို အလဟသ မဖြစ်စေရန်၊ ဆလတ်၊ ကြက်သွန်မြိတ်ကဲ့သို့ အရွက်စားပင်များကို စိုက်ပျိုးထားနိုင်ပါတယ်။

-တိုက်ခေါင်မိုးများအပေါ်တွင် သစ်သားဘောင်ခပ်မြင့်မြင့်ပြုလုပ်၍လည်း မြေဆွေးများထည့်ကာ ကိုက်လန်ကဲ့သို့သော အာဟာရမြင့်၊ ဆေးဖက်၀င်အပင်များကိုခပ်စိပ်စိပ်စိုက်ပျိုးနိုင်ပါတယ်။ တစ်နှစ်ပတ်လုံးခူးယာ စားသုံးနိုင်ပါတယ်။

သတိပြုရမည့်အချက်

ပျိုးအိုး၊ ပျိုးသေတ္တာ၊ ပန်းအိုး များနှင့် စိုက်ပျိုးရာတွင် ပူသောရာသီ၌ အသုံးပြုသော စပ်မြေသည် လျှင်မြန်စွာဖြင့် ရေငွေ့ပျံပြီး ခြောက်သွေ့လာစေနိုင်ခြင်းကြောင့် ပူသောကြမ်းပြင်(သံမန်တလင်း)နေရာတွင် တိုက်ရိုက်ထားခြင်းကို ရှောင်ကြဥ်ရပါမယ်။

ဟင်းသီးဟင်းရွက်ပင်သည် အာဟာရပြည့်၀သော စပ်မြေကို ပို၍လိုအပ်ပြီး ရေလိုအပ်ချက်ပိုများသဖြင့် ပန်းပင်များထက် သေချာစွာ ဂရုစိုက် ထိန်းသိမ်းစိုက်ပျိုးပြုစုရန် လိုအပ်ပါတယ်။