တီမွေးမြူရေး နှင့် တီစွန့်ပစ်မြေဆွေးပြုလုပ်ရာတွင် သတိထားရမည့်အချက်များ

တီမွေးမြူရေးနှင့် တီစွန့်ပစ်မြေဆွေးပြုလုပ်ရာတွင်သတိထားသင့်သည့်အချက်များကို ဖော်ပြပေးလိုက်ပါတယ်။

ပထမဦးဆုံးအနေနဲ့ မွှန်တတ်သော အနံပြင်းသည့်အပင်များ (ဥပမာ ဆေးရွက်ကြီးပင်၊ ငရုတ်ပင်မျိုး၊ ရှောက်မျိုးနွယ်ဝင်ပင်များ)နှင့် အချဉ်ဓာတ်လွန်ကဲသောအပင်များ (ဥပမာ ချဉ်ပေါင်၊ ကင်းပွန်၊ ဆီးဖြူနှင့် ကင်းပလင်းရွက်များ)စသည်တိုအဟာ တီကောင်များတိုးပွါးမှုကို ဟန့်တားတတ်သောကြောင့် အသုံးမပြုသင့်ပါဘူး

တိရစ္ဆာန်များရဲ့ ဘေးထွက်ပစ္စည်းများ ဥပမာ ကြက်ဥအခွံ အသား အရိုးကြီးများကို တီစွန့်ပစ်မြေဆွေးပြုလုပ်ရာတွင် အသုံးမပြုမိအောင် သတိထားရပါမယ်။

ကြက်ချေး ဘဲချေးတို့ဟာ ပရိုတင်းများစွာပါဝင်ပြီး ကြက်ချေးမှ အပူလွန်ကဲတတ်တာကြောင့် တီစွန့်ပစ် မြေသြဇာပြုလုပ်ရာတွင် အနည်းငယ်သာ ချင့်ချိန်သုံးသင့်ပါတယ်။

ပိုးသတ်ဆေး ပေါင်းသတ်ဆေးဖျန်းထားသော အပင်အကြွင်းအကျန်များကို အသုံးမပြုသင့်ပါဘူး။

တီကောင်များအား ငှက် ခြ ပုရွတ်ဆိတ်နှင့် ကြွက်များရန်မှကာကွယ်ဖို့လိုအပ်ပါတယ်။မြေဆွေးပုံပေါ်မှ ဂုန်နီအိတ် သို့ အရိပ်ပိုက်ဖြင့် အုပ်ပေးထားရပါမယ်။ ခြနှင့် ပုရွတ်ဆိတ်များ ကျရောက်ပါက နာရီဝက်ခန့် ကန်ထဲတွင် ရေထည့်ရေလှောင်ပေးပြီး ပြန်ထုတ်ပေးရပါမယ်။ ထုံးအနည်းငယ်ဖြူးပေးခြင်းဖြင့်လည်း ကာကွယ်နိုင်ပါတယ်။

တီမွေးမြူရေးကန်အတွင်းတွင် အစိုဓာတ်အနေတော်ရရှိရန် ရေလောင်းပေးဖို့လိုအပ်သော်လည်း ရေကြာရှည်စွာ မ၀ပ်အောင် အထူး ဂရုစိုက်ဆောင်ရွက်ရပါမယ်။